KALIBO, Aklan— Iga-eubong eon sa maabot nga Enero 23 pagkatapos it Kalibo Sto. Niño Ati-Atihan Festival ro sangka alagang ayam nga ginalamayan it haeos tatlong domingo eon kapareho it sangka tawo sa Oyo Torong St. sa banwa it Kalibo.
Sa interview it Bombo Radyo, nagpanawagan si Albert Manalo, tag-ana it Japanese Spitz nga si Nikki sa iba pang kapareho nana nga dog lover nga magsunod sa pagahimuon nga funeral procession.
Halin sa andang baeay, kun sa siin, makaangkon it public viewing, iga-libot ro bangkay it ayam sa bilog nga Kalibo Pastrana Park ag maga-agi sa guwa it simbahan sakay it sangka topdown nga saeakyan ag pagabutangan it palamuti nga mga bueak ag balloons ag pagadunganan it tukar.
Makaangkon man sigon it pakaon pagkatapos it eubong.
Pitong dag-on sigon nana nga gin-alagaan ro ayam ag ginkabig nga matsa matuod-tuod nga unga.
Suno sigon sa beterinaryong nag-examine, inatake sa tagipusuon ro anang alaga nga naging kabangdanan it anang pagkamatay ko Disyembre 17, 2018.
Maabu eon suno kana ro nakiramay sa pagkamatay it anang ayam nga gintaw-an pa it kaugalingon nga kabaong nga kaabuan kara hay mga amigo ag igbata nga mahilig man sa mga ayam.
Iga-eubong raya sa terrace it anang kwarto sa 4th floor it ginapanag-iyahan nga edipisyo agud nga matsa kahulid gihapon nana raya kon nagakatueog.
