Kalibo, Aklan-Ginpaathag ni Brgy. Kapitan Ramel Pelayo it Brgy. Baybay, Makato, Aklan nga nagpaguwa it listahan ro Department of Agriculture it mga fisherfolks ag farmers apang kat nakaabot kanda ro listahan hay mga pinili ro mga una sa listahan ag bukon sigon it balanse. Pahayag man nana nga raya hay base sa ginpaguwa ng programa ni Presidente Marcos Jr nga tanan nga mga mangunguma ag mangigisda nga haagyan it El Nino hay makabaton it P10,000.
Nangawa sigon sanda kun haman nga ro mga patay patay ag mga mas nagakinahang-ean hay uwa sigon sa listahan nga mas nagakadapat nga taw-an. Nagapaninggitan ag nagapang-eain sigon makaron ro mga nasambitan nga mga mangunguma ag fisherfolk bangud nga sa makaron hay uwa sanda it ginapangbakae ku andang kinahang-eanon.
Ro mga una sigon sa listahan hay ro mga may kapasidad ag may kaya nga pati man ro iba hay bukon man it magingisda nga bisan sanda hay uwa it ideya kun sin-o ro naglista. Gintawag man nana nga kalokohan ro alegasyon nga sa mga kapitan nagahalin ro listahan, bangud nga kun kanda halin ro listahan hay mga pinakapobre dapat sigon ro nakalista.
Sanda sigon ro ginabasoe nga mga kapitanes apang panindugan nana nga uwa kanda naghalin ro listahan,pagpati nana nga basi may tawo sigon nga ginpalista ag tapos hay ginpadaea ro listahan apang ro iba sigon nga una sa listahan hay bukon man it fisherfolk. Bisan nga sueat nga nagapaathag nga kinahang-ean it listahan sa mga mangunguma ag mangingisda nga naapoketuhan it El Nino hay uwa imaw kabaton.
Bangud kara nagpaatwag sanda it Liga nga mga Barangay Meeting ag nagsueat sanda sa DA – Aklan nga ihold ro payout makaron ag ivalidate it uman ro listahan. Hinyo nana nga kabaya daehon ro resulta sa Sangguniang Bayan it Makato. Panan-aw nana nga mahimo may kaangtanan man ro natabo sa pulitika apang para kana nga dapat hay transparency ag uwa it pinilian. Suno pa kana nga raya hay ayuson sa mahipos nga paagi, Samtang, suno man kay Brgy. Loge Supetran it Brgy. Cayangwa, Makato, Aklan nga ro anang nauna nga listahan nga ginparecieve ku Marso hay uwa kaeabanan it haeakip sa anang habaton nga listahan makaron nga July.
Ginklaro man nana nga uwa kana naghalin ro listahan. Panugiron nana nga may nag-adto sigon kana nga taga-DA ag nagpangayo it listahan it mga mangunguma nga nakagaeab eun ukon may nagatindog pa nga paeay kun sin 71 ro anang ginlista matapos kato nag-adto sigon si Rey Malahan ag gapangayo it listahan nga para sa livestock nga apektado it El Nino ag nag-ubra man sigon sanda it listahan nga may kabilugan nga 189 ag sa ulihi nagguwa nga 65 eamang ro una sa listahan halin sa munisipyo. May una man sigon nga tigdyawa sa sangka household. Pagklaro nana nga uwa sanda it nasayuran sa listahan ag mas manami nga magtao it kopya ro mga may IDs nga mangunguma.
