Napueong piso eon ro minimum nga pamasahe sa dyipni.
Raya ro gin-aprubahan it Land Transportation Franchising and Regulatory Board (LTFRB) ko Martes.
Spang kon pagasumahon, kueang pa raya bangud sa mataas nga presyo it diesel nga ginagamit it mga jeepney driver.
Agud sigon nga maka-eagas , dapat P12 pesos ro minimum nga pamasahe.
Bukon sigon it bastante ro piso nga fare increase bangud mahae ro diesel.
Ko Martes, nagtaas ro diesel it P6.50 ag P2.70 man sa gasoline ag ro maeain nga balita, sa Martes hay may una eon man nga bigtime increase sa diesel ag gasolina.
Epekto sigon ro pagtaas it padayun nga giyera sa tunga it Russia ag Ukraine.
Sa pihak man it dugang nga piso nga pamasahe, may mga jeepney gihapon nga owa nagabiyahe.
Suno sa mga jeepney driver, pierde gihapon sanda maskin nga nag-increase it piso.
Rason nga eauman nga tambak eon man ro mga pasahero sa mga libreng sakay nga bus bangud sa kakueangan it mga nagapasadang jeepney.
Owa eon it mahimo ro mga makaeoeo-oy nga commuters.
Mabahoe nga problema kun padayun nga indi magabiyahe ro pilang jeepney bangud sa padayun nga pagtaas it diesel.
Ginarason it pilang drivers, ginabuhi eang nanda ro mga kompanya it langis ag pati operator apang sanda nga nagapasada ro nakanganga kaibahan ro andang pamilya.
Apang suno sa pila nga mas mayad gihapon nga magbiyahe agud nga may makaon.
Maabu eon nga proposisyon nga suspendihon anay ro excise tax nga ginapatong sa petrolyo.
Apang suno sa Department of Finance bukon it ro pag-suspend sa excise tax ro solusyon.
Pinakamanaba eon sigon sa Asia ro tax nga ginapatong it Pilipinas sa mga kompanya it langis.
Bukon sigon it bagay nga punduhon ro pagkolekta it excise tax.
Kun indi gusto nga suspendihon ro buwis sa petroleum products, ayudahan ro mga drayber it jeepney, bus ag traysikel.
Raya eamang ro sangka pamaagi agud nga indi sanda magpundo sa pagbiyahe.
Dugangan ro ginatau nga P6,500 pesos nga ayuda agud nga maka-igo sa mga nagataea-as nga baeak-eon makaron.
