KALIBO, Aklan–Arestado ro sangka babaye matapos ro ginpatigayun nga illegal gambling operation it kapulisan sa Brgy. Aliputos, Numancia.
Gin-insister it suspek nga si Prescious Joy Fajardo nga legal imaw nga nagapataya ag may ID man imaw it Small Town Lottery (STL).
Suno kana, may sangka barangay tanod nga nagpaeapit kana kaina para magtaya sa POS ag ro sambilog hay kat ginasueat sa papel.
Nagpamalibad pa sigon imaw ko una bangud sa POS eamang imaw nagapataya apang mapilit ro tanod rason nga anang ginpasugtan.
Sa owa magbuhay, may sangka pulis sigon nga naka-sibilyan nga nag-adto kana para magtaya sa papel apang gin-insister kara nga owa imaw nagatao.
Nakibot eon lang sigon imaw kat may sambilog pang pulis nga nakasibilyan man nga nag-abot.
Owa sigon nana ginaeauman nga may operasyon eon nga ginakasa ro mga otoridad kontra kana.
Nag-apela man raya sa natungdan nga barangay tanod nga makonsensya sa anang ginhimo.
Raya sigon ro unang kahigayunan nga nag-isyu imaw it papel sa anang pagpataya.
Nasayuran nga nag-umpisa sa pagpataya it STL si Fajardo ko Setyembre 2022.
Presente imaw nga una sa kostudiya it Numancia Municipal Police Station para sa nagakaigo nga disposisyon.
