POLICE Report — Ginboe-an eon it tsapa ag gin-dis-armahan it service firearm ro sangka pulis nga kilaea man nga vlogger matapos raya nga ireklamo it pagpanghimueos it pamilya it sangka babaye nga gina-alegar nga sapilitang ginpa-inom it iligal nga droga ag gin-rape sa sangka farm sa Batangas.
Ginpahayag ni PNP Spokesperson Police Brig. General Jean Fajardo nga presenteng sa restrictive custody sa Police Regional Office 4A ro suspek nga si Police Sr Master Sgt Timothy “Teejay” Virtucio, sangka vlogger nga sumikat sa kataga nga “Sayang ang Tatoo.”
Sa makaron hay ginapamatian eon ro kasong administratibo kontra sa suspek samtang ginahueat pa nga magmayad ro biktima nga una sa ICU it sangka ospital sa Batangas matapos ma-trauma sa anang gindangatan.
Samtang, gina-usoy pa it pulisya ro sambilog pa sigon nga kasabwat ni Virtucio nga nakilaea eamang sa alyas Anthony.
Nasayuran nga natabu ro insidente sa sangka olasyon kun sa siin ginpa-inom it juice nga may halong droga ro biktima ag pagkatapos hay gindaea raya it suspek sa anang farm sa Lipa City, Batangas ag idtu hay ginhimuslan.
Suno kay Fajardo, nagtuhaw sa ginpatigayon nga medical examination nga positibong gin-rape ro biktima samtang ginahueat pa ro toxicology report kun pina-inom it ginabawae nga droga.
