KALIBO, Aklan—Arestado ro sangka 23-anyos nga eaeaki matapos nga takawan ro sangka babaye nga nagapaligos eamang sa baybayon sa isla it Boracay.
Ginkilaea ro suspek kay Anthony Baliguat, residente it Brgy. Unidos, Nabas samtang ro biktima hay ginkilaea man kay Justine Allison Erenea, 23-anyos ag residente it Brgy. Balabag sa isla.
Suno sa imbestigasyon it kapulisan, natabo ro insidente alas-6:30 it gabie sa prenti it sangka hotel sa Station 1 sa isla it Boracay.
Ginasugid nga gin-aywanan it biktima ro anang bag sa beachfront nga may sueod nga cellphone ag camera.
Nakita man it daywa ka mga kaeaeakin-an ro suspek nga nagbuoe it bag it biktima rason nga ginkompronta nanda ro suspek apang dumaeagan raya paadto sa D’Mall area.
Gintakpan na eamang raya it scarf ag nagpaligos kaibahan ro anang barkada apang sa pagbalik nanda hay owa eon ro bag it biktima.
Nadakpan man it daywang paddle board instructor ro suspek, ag ginturn-over sa nakaduty nga sekyu antes gintugyan sa Malay PNP para sa nagakaigo nga disposisyon.
