KALIBO, Aklan—Sa kauna-unahang kahigayunan sa probinsiya it Aklan, sa sueod it sangka ospital ginpadayun ro kunta hay church wedding nga ginpangunahan ni Fr. Jude Rebaldo, parish priest it St. Joseph Spoused of the Blessed Virgin Mary Church sa Banga ko agahon it Sabado, Nobyembre 28.
Suno kay mr. nionelo roselo, lolo it bride nga si Mrs. Kate Iturralde nga buean pa it Disyembre ginaeauman nga maga-unga ro anang apo, apang samtang nga nagapahaum para sa kasae nga naka-schedule it alas-2:00 it hapon hay nakabatyag raya it pagsakit it anang tiyan bandang alas-10:00 it agahon.
Sa baylo nga bridal car, ginsueang raya it ambulansiya paagto sa sangka pribadong ospital sa banwa it Kalibo ag makataliwan ro daywang oras hay nag-unga raya it baby girl.
Ginsaysay pa ni lolo Nionelo nga matapos nga masayuran ni Fr. Jude ro natabu, raya eon mismo ro nag-agto sa ospital ag ginpatigayon ro wedding ceremony sa private room it pasyente kaibahan ro groom nga si Jed Iturralde nga ginsaksihan it pilang miyembro it pamilya ag staff it ospital.
Nagpalakpakan ag naghinugyaw ro nakasaksi sa kasae matapos ro anunsyo it pari nga “you may now kiss the bride” nga simbolo it wagas nga pagmeahaean it mag-asawa.
Matapos man ro “go signal” it mag-asawa, gindungan eon lang ni Fr. Jude ro bunyag it unga.
Pagkatapos it kasae, ginpadayun ro bonggang handaan sa baeay it bride sa Barangay Bacan, Banga.
Samtang, maskin si Banga vice mayor Boy Redison nga sambilog kunta sa mga magatindog nga ninong hay nakibot man sa hitabu.
Gin-abisuhan eon lang sigon sanda nga sa ospital eon lang ginpatigayon ro seremonya matapos nga mag-unga ro bride.
