KALIBO, Aklan — Haum ro sangka babaye nga gina-alegar nga nagbo-oe sa kwarta ag iba pang importanteng gamit it 24-anyos nga tagreklamo nga German national nga makipagbueuligan ag magtau it anang panaysayon sa mga awtoridad sa matuod nga natabu.
Raya hay matapos nga matumod ag maka-istorya it mga katapo it Kalibo Municipal Police Station ro babaye nga ginasugid nga nag-uli sa Iloilo.
Depensa it babaye nga nag-away sanda it foreigner sa sueod it hotel nga andang gin-tiniran sa Jaime Cardinal Sin Avenue, Kalibo, aga-aga it Lunes, Abril 13, rason nga nagpanaw imaw agud nga makalikaw sa anuman nga gulo ag ro posibleng pagsakit kana it anang gina-alegar nga nobyo.// Haum sigon imaw nga ibalik ro kwarta ag passport it German national .
Nauna kara, nagdangop sa kapulisan ro nasambit nga dumueuong kaibahan ro receptionist it hotel bangud sa gina-alegar nga pagtakaw sa anang kwarta nga naga-abot sa P30,000 ag iba pang gamit nga nakasueod sa bag .
Nagapadayun pa ro imbestigasyon it kapulisan sa nasambit nga insidente.
