Sangka social media influencer sa Argentina ro ginpakaslan ro anang kaugalingon apang matapos ro 24 oras hay nagdihon man eagi it diborsyo!
Ko Pebrero, gin-anunsyo ni Sofi Maure sa anang mga social media accounts nga pagapakaslan nana ro anang kaugalingon.
Kaibahan sa nasambit nga anunsyo hay ro anang litrato nga nakasuksok it wedding gown ag tiara nga himo sa bueawan ag litrato it cake.
Sikat nga influencer ro 25-anyos nga si Maure sa Argentina.
May una imaw nga 500,000 followers sa Twitter, Instagram ag Tik Tok.
Kaabuan sa mga followers ni Maure hay nagpahayag it pagsuporta sa anang pagpakasae sa kaugalingon apang may pila nga nagtau it pagpangbatikos.
Maskin nga nakabaton it suporta si Maure sa kakaiba nana nga desisyon, insigida man nga nagbag-o ro anang isip.
Nag-file it divorce si Maure ko Pebrero 20, sang adlaw matapos nana nga pakaslan ro kaugalingon.
Suno sa social media account ni Maure, gindiborsyo nana ro anang kaugalingon bangud nga indi eon nana raya masarangan pa.
Bangud kara, mas nagbaskog ro mga pagpangbatikos sa influencer ag gin-akusahan imaw nga nagapapansin eang agud nga maistoryahan ag magtaas ro social media engagement.
Owa ginasabat ni Maure ro nasambit nga mga pasibangod ag presenteng nagahipos ro anang mga social media accounts.
