KALIBO, Aklan–Nakataeana nga pagapasakaan it nagakaigo nga kaso makaron nga adlaw it Numancia PNP ro sangka babaye nga andang naaresto kasunod it ginpatigayun nga illegal gambling operation sa Brgy. Aliputos, Numancia.
Suno kay Police Major Raymund Delegiro, OIC Chief of Police it Numancia Municipal Police Station nga masobra tunga sa buean man nanda nga ginpaidaeom sa surveillance ro suspek nga si Precious Joy Fajardo.
Kahapon eamang sigon raya nadakpan it mga operatiba matapos nga maaktuhan nga iligal nga napataya it bookies sa idaeom it Small Town Lottery (STL).
Base sigon sa pulis nga nagpakunu-kunu nga manugtaya nga ginsueat eamang ni Fajardo sa papel ro anang numero imbes nga sa resibo nga gina-isyu it STL.
Angot kara, nauna eon nga ginpamalibaran it suspek ro alegasyon kontra kana ag gin-insister nga legal ro anang pagiging agent kamana man nga may ID imaw it STL.
Sa makaron hay una eon sa kostudiya it Numancia PNP si Fajardo para sa nagakaigo nga disposisyon.
