Balitang Espesyal————–Sangka 29-anyos nga babaye nga gintago sa pangaean nga “Zhu” ro naeakot sa sangka car accident.
Maskin nga owa man it naangkon nga maskin ano nga nina, ginlaygayan imaw it anang doktor nga magpa-CT scan agud nga makasiguro nga owa it damage nga natabu sa anang utok.
Sa mayad nga swerte, owa it nakitang trauma sa anang utok nga may kaangtanan sa aksidente apang ro ginkahangaw-an it doktor hay ro nakitang daywang dagum nga naka-eubong sa anang utok .
Ro ginkangawa pa it doktor, owa it kahilabtanan sa aksidente ro daywang dagum bangud nga owa it nakitang skull ukon scalp injury nga indikasyon nga bag-ong haeubong eamang raya sa utok ni Zhu.
May pagduda ro mga doktor nga posibleng ginhungod ukon aksidenteng naituslok sa ueo ni Zhu kat imaw hay eapsag pa ro mga dagum.
Suno sa doktor, sa nipis it mga dagum, indi kara masarangan nga makabuho it sangka fully developed nga ueo.
Suno man kay Zhu, owa imaw it natandaan nga nakaangkon it head injury rason nga posibleng eapsa pa eamang imaw kat raya hay matabu .
Suno sa doktor, base sa nipis ag posisyon it mga dagum sa utok ni Zhu, masyadong maisot ro tsansa nga makaangkon raya it problema ag komplikasyon sa anang ikamayad nga eawas.
Pagkatapos mataw-an it health clearance it mga doktor, insigidang gindaea ni Zhu ro findings it anang CT scan sa pulisya bangud nga may pagduda eon imaw kon sin-o ag ano ro rason it mga dagum sa anang utok.
Sa makaron hay owa anay naila si Zhu nga magtau it detalyadong pahayag angot kara.
