Bangud sa kagustuhang makaangkon it manami nga kilay, nagpaidaeum sa eyebrow transplant ro 36-anyos nga si Isabelle Kutxi it Tetbury, England.
Ko June 2021, nag agto si Kutxi sa Poland agud nga idtu magpa-eyebrow transplant.
Gamit ro pilang strand it buhok nga ginbo-oe halin sa anang ueo, ginsaylon raya sa anang kilay agud nga maging madamoe ro tubo it anang buhok.
Teenager pa eamang si Kutxi hay bukon eon imaw it kuntento sa anang kilay.
Hasta nga imaw hay naggueang eon, sang oras ro anang gina-ubos sa pag-ayos it kilay bangud nga manipis ag bukon it mayad ro tubo it buhok.
Kat matukiban nana ro angot sa eyebrow transplant naging interesado imaw kara.
Ginpili nana nga sa Poland ipa obra ro procedure bangud nga nagabalor raya idtu it 1500 euros kumpara sa 5000 euros sa England.
Nagbuhay it tatlong oras ro transplant ag suno kay Kutxi, owa imaw it nabatyagan nga sakit halin kara.
Matapos ro masobra sa tatlong buean, nakita eon ni Kutxi ro epekto it transplant ag nagsobra pa sa anang expectations ro naging resulta it procedure.
Bangud nga halin sa buhok sa ueo ro anang kilay, owa raya nagapundo sa paghaba ag kinahangean nana raya nga utdon kada buean.
Suno kay Kutxi, owa nana raya ginahinoesuean ag maisot raya nga bagay kabaylo it ginahandum nana nga kilay goals.
