Sangka 30-anyos nga babaye sa Lagos, Nigeria ro nakalista it world record matapos imaw nga maggantsilyo it gown sa sueod it tatlong araw!
Ginkumpirma it records keeping organization nga Guinness World Records nga si Chidinma Modupe Okafor ro pinakabag-ong record holder it titulong “Longest Crocheting Marathon” matapos raya nga makahimo it “crochet-a-thon” nga nagbuhay it 72 oras ukon tatlong araw.
Napiyerde ni Okafor ro previous record ni Alessandra Hayden it U.S. nga may una eamang nga 34 oras.
Suno kay Okafor, unga pa eamang hay mahilig eon imaw nga maggantsilyo.
Para pahauman ro world record attempt, pilang buean nana nga ginkondisyon ro anang eawas ag isip.
Agud nga indi mag-eain ro ikamayad nga eawas ni Okafor sa marathon, may pahanugot halin sa Guinness nga magpahuway imaw it limang minuto sa kada sang oras.
Ro unang plano ni Okafor hay maggantsilyo it wedding gown apang kat matantiya nana nga indi kara masarangan nga makahuman it eambong nga pangkasae sa sueod it tatlong adlaw, nagdesisyon imaw nga sangka evening gown ro anang obrahon.
