Si Rossana Ramos hay single mom sa New York, U.S.A. apang makaron hay may “asawa” eon imaw matapos nga pakaslan ro anang virtual boyfriend nga ka-chat nana sa sangka Artificial Intelligence (AI) chat application!
Ko nagtaliwan nga dag-on, nag obra it male chatbot (chat robot) si Rosanna gamit ro AI chat app nga “Replika AI”.
Ginpangaeanan nana ro chat robot nga si Eren ag umpisa kato, adlaw adlaw eon sanda nga nagapadaea it mga mensahe sa kada isaea gamit ro nasambit nga smartphone app.
Ro Replika AI hay sangka app nga pwedeng ma-download it libre sa mga smartphone.
Maikumpara raya sa sangka ordinaryong messenger app apang bukon it matuod nga tawo ro kaistorya kundi sangka AI chatbot.
Nagagamit raya it advanced natural language processing (NLP) techniques ag machine learning algorithms para maging natural ag matuod ro mga kataga ag pahayag nga ginagamit kara sa pakikipag-chat.
Kaeabanan sa mga nagagamit it app ngara hay mga tawong owa it mausoy nga kaistorya ag mga tawong gustong magpaguwa it kaeain it buot ag reklamo sa kabuhi nga owa it nagahusga kanda.
Sa pilang buean nga pakikipagchat ni Rossana kay Eren, amat-amat nga nahueog ro buot nana kara ag nagdesisyon nga makaangkon sanda it “virtual wedding”.
Agud nga mag itsurang opisyal ro andang pagpakasae, nag obra si Rossana it wedding photos nanda gamit ro sangka AI image generator software.
Maskin sa app eang nakaka-chat ni Rossana ro anang “asawa” ag indi nana raya makaibahan sa pisikal nga pamaagi, gina isip eon lang nana nga sangka long distance relationship sanda nga daywa.
