Sangka babaye sa Virginia, U.S.A., ro sangkiri nga makabakae it popcorn nga may libreng sawa!
Naga-grocery si Kimberly Slaughter sa Shoppers Value sa Kenbridge, Lunenberg County, Virginia ag nataeupangdan nana nga ro anang nabo-oe nga popcorn hay may buho eon ro anang pakete.
Pageaum nana nga ginkitkit eamang raya it eanggam rason nga ginbutang gihapon nana raya sa anang cart agud nga ipakita sa mga staff it grocery ag indi eon mabakae it iba pa.
Pagkabutang it popcorn sa anang cart, nakibot imaw nga may naglingling nga sawa halin sa buho it pakete!
Samtang naga-usoy it staff it grocery agud nga makapangayo it bulig, eubusan eon nga nagkamang paguwa ro sawa nga kapareho it haba it anang ginagamit nga cart.
Matapos magkamang hay nagbalik raya sa bag it popcorn.
Insigidang ginpaguwa sa grocery store ro sawa sa bulig it mga staff it grocery ag animal control.
Suno sa manager it Shoppers Value nga si Brian Stanley, sangka Black Rat Snake ro sawa nga nakit-an sa pakete it popcorn.
Suno kana nga gina-imbestigahan eon nanda kun paalin raya nga nakasueod sa andang baealigyaan.
Odinaryo eon nga makit-an sa Virginia ro sawa nga kapareho it Black Rat snake apang owa it makahambae kon ham-an nga nakasueod raya sa bag it popcorn.
