KALIBO, AKLAN — Namatay samtang gina bueong sa Aklan Provincial Hospital ro sangka 22-anyos nga babaye matapos bugbugon it 14-anyos nga igmanghod ag bunaean it kahoy sa ueo sa Brgy. Torralba, Banga, Aklan.
Ro biktima hay gin kilaeang si Herlene Narosa, residente it nasambitang lugar hay nakaangkon it lastro sa ueo matapos bugbugon ag bunaean sa ueo it mismong igmanghod nga nakilaea sa alyas nga “Laboy”.
Gina sugid nga nagpangayo it bulig ro daywa pang menor-de-edad nga igmanghod it biktima nga nakasaksi sa krimen sa andang mga kaeapitbaeay nga insigidang nag-report sa kapulisan.
Suno kay SPO1 Felialyn Navarra it Banga Police station nga nakaangkon it mga gaob ag nina sa eawas ro biktima matapos rayang bunaean it pinutoe nga kahoy it maka-tatlong beses.
Owa sigon sa andang baeay ro ama ku mga raya bangud nagatrabaho raya bilang sangka panday kat matabo ro insidente samtang, ro andang ina hay sa pihak eon nga kinabuhi.
Nasayuran nga ro biktima hay tatlong beses eon nga gin himuslan it andang mga paryenti ag gina sugid nga may deperensiya sa paminsaron.
Gin daea man ro menor-de-edad sa Department of Social Welfare and Development (DSWD) para sa counseling matapos nga mapatay kara ro magueang kat gin pugngan imaw nga makasueod sa andang baeay agud mag inom konta it tubi.
Gin pamilit sigon it biktima nga gin palayas eon it andang ama si Laboy bangud sa pagpanakit sa iba pang igmanghod rason nga indi eon raya pwedeng magsueod pa sa andang baeay.
