KALIBO, AKLAN— Nagdangop sa taeatapan it pulisya ro sangka babaying Israeli matapos nga ginpakitaan sigon it kinatawo it sangka cook samtang nga naga-yoga sa Sitio Bulabod, Brgy. Balabag sa isla it Boracay.
Ro turista hay nagapang-edaton it 23-anyos ag taga Israel samtang nakilaea man ro suspek nga si Michael John Carbajosa, 22, tubong Tanza, Iloilo.
Nasayuran nga nakita sigon it suspek ro turista nga nagapatigayon it pag-yoga sa nasambit nga lugar kun sa siin ginpaeapitan nana raya ag gintueok it malapuyot ukon mapang-akit.
Sa paghandum it suspek nga mataeupangdan imaw it dumueuong hay nagpaeapit raya it haeos sang dupa eamang ro distansya halin sa daeaga.
Suno pa sa dumueuong nga matapos sigon ro pilang minuto hay amat-amat eon nga gin-us-us it ni Carbajosa ro anang suksok nga pang-ubos ag hayagan nga ginpakita ro kabilugan it anang kinatawo.
Sa pagsinggitan sigon it dumueuong agud nga makapangayo it bulig sa mga tawo sa palibot hay dali-dali man nga nagdaeagan paeayo ro suspek apang insigidang naaresto it mga rumespondeng pulis.
Sa makaron hay nakakulong eon sa Malay Police Station sa Boracay si Carbajosa ag magapangatubang sa kasong grave scandal.
