Nagapabilin nga normal ro pamaligyaon it mga prutas maskin nga tatlong adlaw eon lang ro nabilin antes ro pagsug-aeaw it bag-ong dag-on.
Suno sa fruit vendor nga si Imelda Dela Cruz nga may pwesto sa Roxas Avenue, Kalibo nga posibleng nagatipid makaron ro mga pumueoyo bangud sa kamahaeon it mga baligya.
Ginpahayag dugang nga ko nagtaliwan nga mga dinag-on hay nagadagsa eon sigon ro mga bumaeakae apang makaron hay uwa eon it mga naga whole sale kanda.
Maabo eon sigon ro mabakae makaron sa mga kabaryuhan ag sa online shopping rason nga nagapabilin nga matumal ro andang bentahan it prutas nga patok kunta makaron nga holiday season.
Pila sa mga prutas nga nataeopangdang nga may pagmahae sa presyo hay ro mansanas, peras, lemon ag grapes.
Raya man ro mga prutas nga nakaangdan nga bak-eon it mga pumueoyo nga igadisplay sa andang mga lamesa bilang kaparte eon it media noche.
