KALIBO, Aklan — Hugut nga ginabantayan it Bureau of Fire Protection (BFP) Numancia ro mga lehitimong baealigyaan it paeupok sa nasambit nga banwa sa gintaeana nga lugar para kanda sa may Brgy. Laguinbanua East, Numancia.
Suno kay SFO1 Joseph Alvin Murillo, chief operations officer it BFP-Numancia nga tingub pwersa sanda nga nagpatigayon it inspeksyon ag monitoring it Numancia Municipal Police Station bangud nga ro mga paeupok hay ginakabig sigon nga explosives.
Gin-usisa man nanda kon ro tanan nga 24 nga mga firecracker vendors nga nataw-an it permit hay nakasunod sa mga requirements sa idaeum it fire safety codes kapareho it pagbutang it fire extinguisher, drum nga puno it tubi, baeas, sign board nga “no testing, no smoking,” ag iba pa.
Padumdum pa ni SFO1 Murillo sa mga pumueuyu nga likawan ro paggamit it paeupok agud nga makalikaw sa anuman nga disgrasya.
