Balitang Espesyal——Nag-viral sa Thai netizens ro Facebook post it sangka nagahingaean kay Ekarat Chuanchoomchun bangud sa gin post nana nga litrato it sangka kakaibang baeay it anay nga anang nakit-an sa kagueangan it Ban Khok Klan community sa Surin, Thailand kan-o eamang .
Nakibot ro netizens bangud nga korteng unga nga eaeaki ro baeay it anay ag suno pa sa mga residente it nasambit nga lugar, kaitsura kara ro sikat nga unga nga mueto sa lugar nga si Ai Khai.
Suno sa mga nagaeanog nga istorya sa banwa it Ban Khok Klan, si Ai Khai hay sangka unga nga nagaserbisyo sa sa mga monghe ko 18th century.
Kilaea imaw nga pirmeng nagatau it premonisyon angot sa paeaabuton.
Nakakabulig ro anang mga premonisyon agud nga makalikaw sa aksidente, kalamidad ag mga maeain nga nagadayo kato sa andang lugar.
Hasta sa makaron, ginapangamuyuan si Ai Khai it mga residente it surin province agud nga pangayuan it bulig sa andang mga problema ag pangayuan it numerong pagatayaan sa lotto.
Bangud sa nakit-an nga baeay it anay nga kaitsura ni Ai Khai, ginadayo eon it mga tawo ro magamo nga kagueangan agud nga magpangayo it masuwerteng numero nga igataya sa lotto.
