KALIBO, Aklan–Nagakasubo makaron ro mag-asawang senior citizen matapos nga ginsueod it mga owa pa makilaeang persona ro andang baeay ko nagtaliwan nga adlaw sa Brgy. New Buswang, Kalibo.
Suno kay Martin Eulogio, 80-anyos nga samtang nagakatueog sanda hay napan-uhan it anang misis ro pagsueod it sangka eaeaki sa andang baeay kung siin ginbuoe kara ro sling bag.
Gintinguhaan pa sigon nana nga eagson ro suspek apang madasig raya nga nakapaeagiw kaibahan ro sangka persona nga naka-abang sa guwa sakay it motorsiklo ag madasig nga nagpaharurot.
Nakasueod sigon sa nasambit nga bag ro mga importanteng ID, singsing, pendant ag cash.
Ro insidente hay ginpa-blotter eon man it mag-asawang Euolgio sa Kalibo Municipal Police Station.
Naga-apela sigon sanda sa mga suspek nga kung mahimo hay ibalik eon lang ro mga ID bangud nga importante ro mga raya.
