KALIBO, Aklan — Namatay samtang ginabueong sa ospital ro sangka 63-anyos nga lolo matapos nga aksidenteng natumbahan it nabukwang nga higanteng puno it acacia ro andang baeay bandang ala-1:00 it aga-aga it Domingo sa Brgy. Tabangka, Numancia.
Nakilaea ro namatay nga magueang nga si Jones Templonuevo, sangka mangunguma ag residente it nasambit nga lugar .
Suno kay Mercydenia Templonuevo, asawa it biktima nga samtang hamuok sanda nga nagakatueog it anang mister sa andang kwarto kat mabatyagan nga matsa may eumagabong sa guwa it andang baeay .
Kasunod kara hay ro pagpangayo kana it bulig it anang mister halin sa andang sala .
Posible suno kana nga pagkabati nga matsa may naga-eagit-it sa guwa it andang baeay hay nagguwa ro anang mister ag kat nagapabalik eon kunta sa andang kwarto hay naigpit raya matapos nga eubusan eon nga bumagsak ro puno.
Nasayuran nga mismong sa eugban it mag-asawa natumba ro puno nga sa mayad nga swerte hay nasagang it kisame rason nga owa napuruhan ro misis.
Ginapatihan nga bangud sa naeksperyensiyahan nga pag-uean-uean rason nga naghumok ro eugta nga naging dahilan it pagbagsak it puno.
Sa makaron hay nagapangayo it bulig ro misis sa kinahangeanon nga gastos sa pagpa-eubong sa anang asawa.
Nasayuran nga haeos napueong dag-on eon nga naga-istar ro mag-asawa sa andang gintukod nga baeay kun sa siin owa sanda nakaangkon it unga.
Indi eon man sigon haeos makatrabaho ro anang mister bangud sa arthritis ag iba pang ginabatyag nga sakit sa anang eawas.
