KALIBO, Aklan—Padayun nga naga-aray ro mga miyembro it Banga Federation of Tricycle Operators and Driver’s Association (BAFTODA) bangud sa limitadong numero it mga pasahero sa pihak it pagpataas sa seating capacity it mga pampublikong transportasyon sa bilog nga probinsya it Aklan.
Suno kay BAFTODA President Raul Teodosio, nagapabilin nga malisod ro kahimtangan nanda nga mga driver bangud maeaka eamang ro mga sumaeakay.
Sa kamatuoran, naga-avergae eamang sigon sanda it hasta ap-at nga trip sa sueod it sang adlaw sa andang rota nga Poblacion to Aklan State University (ASU) main campus vice versa.
Dugang pa kara nga masami nga daywang ka mga pasahero eamang ro andang ginasakay kung siin P20 ro andang sukot sa kada sambilog.
Apang, may mga kahigayunan man sigon nga ginapanabaan nanda raya eabi eon kung nagahinyu ro mga commuter.
Aminado si Teodosio nga may mga nakaabot eon kana nga reklamo angot sa pilang tricycle driver nga mataas gihapon ro sukot it pamasahe.
Samtang, nagahueat man sigon imaw nga magpatawag it pueong si Sangguniang Bayan member Allen Maming, Chairman it Committee on Transportation para mai-plastar ro mga bag-ong patakaran ag ro pagpanaba it pamasahe.
