KALIBO, Aklan — Ginatugis eon makaron it kapulisan ro sangka eaeaki nga gina-alegar nga nagsalisi sa sangka money changer sa isla it Boracay.
Nag-report sa Malay Police Station ro biktima nga si Nico Jun Caagbay, 26, empleyado it sangka money changer ag residente it Sitio Manggayad, Brgy. Balabag sa nasambit nga isla.
Suno sa biktima nga nakibot eon lang imaw matapos nga madiskubre nga naduea ro anang backpack nga may sueod nga kwarta nga naga-abot sa P2.5 milyon pesos ag iba pang personal nga gamit nga ginapatihan nga ginbo-oe it owa nakilaeang miyembro it Salisi Gang sa sueod it andang pwesto.
Base sa report, ginbilin nana sa saleslady it kaiping nga baraka nga toetan-awon ro anang gin-aywan nga bag sa sueod it andang pwesto agud nga magbanyo, apang sa anang pagbalik hay nadiskubre it biktima nga naduea eon ro anang bag nga may sueod nga nasambit nga kantidad nga ginapanag-iyahan sigon it ka-live-in partner it anang igmanghud nga babaye kamana man ro passbook ag checkbook kara.
Mag-eowas kara, naduea man ro haeos P170,000 pesos nga kwarta it andang opisina ag anang cellphone.
Ginatumod makaron it pulisya ro pagkatawo it suspek nga posibleng nagdaea sa bag it biktima base sa bo-oe it CCTV sa lugar.
Nakita sa CCTV footage ro eaeaki nga nakasuksok it itom nga jacket nga may hood nga nagatikang paguwa it money changer bitbit ro gintakaw nga bag.
