KALIBO, Aklan — Nagpanumpa eon bilang bag-ong alkalde it Malay, Aklan si Mayor Abram Sualog.
Raya hay kasunod it pagsirbi it Department of Interior and Local Government (DILG) sa dismissal order kontra sa dating mayor nga si Ceciron Cawaling ko Miyerkules it hapon, Abril 24, 2019 sa Munisipyo it Malay kasunod it anang an-um nga buean nga preventive suspension.
Nagpanumpa si Sualog kay Manocmanoc barangay captain Nixon Sualog sa presensiya ni DILG-Aklan provincial director Roy Defiño.
Ginpaguwa ni DILG Region 6 Director Ariel Iglesia ro dismissal order, nga kon sa siin sanday Cawaling ag ro business permit and licensing officer Jen Salsona hay indi eon makapungko sa anuman nga posisyon sa gobyerno at ginduea ro andang mabaton nga benepisyo.
Ro daywa hay napamatud-an nga guilty sa grave misconduct, gross neglect of duty, conduct unbecoming of a public official ag conduct prejudicial to the best interest of the service bangud sa gina-alegar nga pagpabaya sa isla it Boracay.
Kadungan it anang pagpungko bilang alkalde it nasambit nga banwa, ginpahayag ni Sualog nga hugut kara nga igapatuman ro mga ordinansa ag pagbulig sa Boracay Inter-Agency Rehabilitation Management Group sa nagapadayun nga rehabilitasyon sa isla.
Pagatutukan man sigon it anang administrasyon ro peace and order eabi eon sa Boracay agud nga masiguro ro padayun nga pag-umwad it industriya it turismo sa isla.
Samtang, nagpamalibad man nga magtau it iba pang detalye si mayor Sualog sa pagsibak sa pwesto sa anang ginbayluhan nga si Cawaling.
