KALIBO, Aklan — Target it bag-ong Schools Division Superintendent it Aklan nga mapamayad pa ro kalidad it edukasyon sa probinsiya matapos raya nga pormal nga nagpungko sa anang pwesto ko Oktubre 1.
Sa interview it Bombo Radyo, ginpahayag ni Dr. Miguel Mac D. Aposin nga ginapahauman man nanda makaron ro nakataeanang pag-host it Aklan sa nagahilapit nga Western Visayas Regional Athletic Association (WVRAA) meet 2019.
Nasayuran nga si Dr. Aposin hay dating na-assign sa Iloilo Division nga nagbueos sa pwesto ni Dr. Salvador Ochavo, Jr.
Si Aposin nga tumandok it Pontevedra, Capiz hay nagtapos it anang Bachelor of Science in Mathematics sa Filamer Christian University dating Filamer Christian College ko 1987 ag ro anang Master of Education specializing in Administration and Supervision sa West Visayas State University ko 1999 ag ro Doctor of Education in Educational Management sa Capiz State University ko 2006.
Nag-umpisa imaw nga magturo sa pampublikong eskwelahan ko 1988 bilang Teacher I sa Hipona ukon Puentevedra National High School.
Ko 2007, naging principal imaw it Tuburan National High School sa Maayon, Capiz ag Florentina Batoampo Degala National High School sa Roxas, Capiz ko 2008.
Nagtindog man si Aposin bilang officer-in-charge-Assistant Schools Division Superintendent DepEd Capiz ag principal it Malonoy National High School sa Dao, Capiz ko 2009.
Imaw ro Schools Division Superintendent it DepEd Capiz sa sueod it tatlong dag-on hasta nga na-assign imaw sa DepEd Iloilo ko Hulyo 2018.
Sa pihak nga parte, si Ochavo nga naghalin sa Sapian, Capiz hay igabalik sa anang home province samtang si Dr. Roel Bermejo ro nagbueos kay Aposin sa DepEd Iloilo Schools Division.
