KALIBO, Aklan—May bag-o eon nga Acting Provincial Director ro Aklan Police Provincial Office (APPO).
Raya hay matapos nga pormal eon nga nagpungko sa pwesto si Police Colonel Crisaleo Tolentino.
Ginpasiguro kara nga pagapadayunon nana ro mga naumpisahan it mga naunang provincial director agud nga mapabilin ro peace and order sa probinsya it Aklan.
Ginlaygayan man kara ro publiko nga indi maging kampante sa pihak it pagiging insurgency free it probinsya ag pagiging clear sa illegal nga droga it pilang banwa ag barangay.
Dapat sigon nga maging alerto ro tanan para indi eon mauman ro mga nasolbar eon nga problema kapareho it krimanalidad, illegal nga droga ag insurhensiya.
Si Tolentino nga tumandok it Dumaguete City hay nag-graduate sa Philippine National Police Academy (PNPA) Kaagapay Class it 1996.
Ro pinaka-una sigon nana nga assignment hay sa Presidential Security Group (PSG) sa idaeom it administrasyon ni dating presidente Fedil V. Ramos.
Pagkatapos hay na-assign imaw sa CIDG halin dag-on 1997 hasta 2007.
Mag-eowas kara, nadestino man imaw sa nagkaeain-eain nga lugar ag departamento.
Si Tolentino hay bukon eon it bag-o sa Western Visayas bangud na-assign man imaw bilang Regional Chief it Aviation Security Unit it Region 6.
Samtang, nag-apela man raya sa kaparehong police officer nga ipabilin ro pagiging professional sa nagahilapit nga 2022 national and local elections kamana man nga maging non-partisan.
