Kalibo Aklan ———–Nagpakitang gilas eagi ro bag-ong hepe it Makato Municipal Police Station nga si P/Major Willian Aguirre.
Ko lunes pa eamang, Agosto 9 naka-deploy sa nasambit nga police station si Major Aguirre apang natigayon kara nga maaksyunan ro pilang naka pending ukon owa pa naresolba nga mga kaso.
Suno kana nga nagpasa sanda sa Provincial Crime Laboratory Office it specimen it paraphin examination it mga person of interest sa pagpatay kay Arnold Tipan ko Hulyo 17 sa Barangay Cayangwan, Makato.
Mag-eowas kara, ginpasakaan nanda it kasong pag-eabag sa RA 10591 ukon illegal nga paghupot it armas ro sangka eaeaki nga mabuhay eon nga ginareklamo sa Sitio Hagakhak , Brgy. Tugas, Makato matapos nga nagapinaeupok it baril.
Narekober kana ro .22 caliber rifle .
Kapin sa 200,000 pesos ro gintaeana nga piyansa it korte para sa anang temporarong kahilwayan .
Sa pihak nga parte, hugut nga ginapatuman it mga otoridad ro mga health protocol kapareho it pagsuksok it face mask, face shield ag physical distancing agud nga matapna ro pagkalhit it COVID-19 sa nasambit nga banwa eabi eon sa mga matawong lugar kapareho it tindahan .
Ginatutukan man sigon nanda ro mga tricycle nga overloaded ukon masobra sa daywang pasahero ro sakay.
Pilang violators sigon hay gin-isyuhan nanda it citation ticket .
Nakabantay man suno kana ro mga pulis sa mga nakabutang nga checkpoint samtang sa local barangay unit hay mga tanod ag iba pang opisyal .
Kabulig man nanda ro mga gindeploy nga force multipliers .
Samtang, hugut man nga ginapatuman sa banwa it makato ro ‘no movement Sunday’, ro liquor ban , curfew ag mass gathering .
Pagagamiton man sigon nanda ro social media agud nga maipaabot sa tanan ro mga ginapatuman nga restrictions sa nasambit nga banwa.
