Gin-appoint ni Pangueong Ferdinand R. Marcos Jr. si trade diplomat Dita Angara-Mathay bilang bag-ong sekretaryo it Department of Tourism, base sa gin-anunsyo it Presidential Communications Office (PCO), adlaw it Biyernes, Abril 10.
Ginakabig it PCO si Angara-Mathay bilang sangka seasoned public servant nga may dekada eon nga eksperyensiya sa sa trade, investment, ag international economic engagement.
Dugang pa it PCO, ginapakita it anang appointment ro katuyuan it administrasyon nga kabigon ro turismo bukon eamang bilang sangka cultural showcase kundi bilang “a strong driver of jobs, businesses, and regional development.”
Pahayag pa kara nga gusto it gobyerno nga mas pa nga ilinya ro turismo sa economic growth pinaagi sa pag-engganyo it investments, pagsuporta sa local industries, ag pagsiguro nga mabatyagan sa mga rehiyon ro benepisyo halin sa turismo.
Ginbayluhan ni Angara-Mathay si dating Tourism Secretary Christina Frasco, nga nagasirbi eon makaron nga Presidential Adviser for Sustainable and Resilient Communities.
Bago ro anang appointment, nagsirbi si Angara-Mathay bilang Commercial Counselor sa Philippine Trade and Investment Center sa Tokyo, kun sa siin ginpangunahan nana ro strategic partnerships sa mga industriyang Hapones, sambilog sa nagapangunang ginahalinan it investment, technology, ag tourism it Pilipinas.
Ginpahayag it PCO nga ginapamunuan ni Angara-Mathay ro mga programang naga-angot sa global partnerships ag konkretong resulta sa lokal, kaibahan ro enterprise development, pagpabaskog it mga industriya, ag pagpaeapad it oportunidad para sa mga negosyong Pilipino, eabi eon sa micro, small, and medium enterprises.
