KALIBO, Aklan—Patay ro sangka bagitong pulis matapos mahueog ro ginasakyan kara nga motorsiklo sa sangka underconstruction nga tulay nga ginatawag nga Mabilo bridge pasado ala-1:30 kaina it aga-aga.
Binawian it hueam nga kinabuhi ro driver it motor nga si Patrolman Cesar Nedic, Jr. , residente it Barangay Alaminos, Madalag ag presenteg naka-destino sa Aklan Police Provincial Office Mobile Force Company.
Ro biktima hay nag-angkon it grabeng lastro sa anang ueo ag iba pang parte it eawas.
Ro tulay hay nagakonekta sa Barangay Mabilo sa Kalibo ag Tambak, New Washington.
Ginasugid nga gin-arado it pulis ro mga signages nga himo sa saesaeon sa tulay.
Nahueog halin sa tulay ro ginamaneho nana nga motorsiklo ag bumagsak sa idaeum it suba.
Nagatuhaw sa imbestigasyon nga halin sa Tambak, New Washington ro biktima kaibahan ro iba pang mga katrabaho ag nagapa-uli eon kunta kat matabu ro aksidente.
Samtang, ginpahayag ni alyas Efren, sangka residente sa lugar nga nakabati imaw nga may eumagabong kaina it aga-aga, apang ginbawaean imaw it anang mga unga nga magguwa bangud sa mabaskog nga uean.
Makabig suno kana nga accident prone ro nasambit nga lugar rason nga ginahinyu nanda nga padasigan ro construction it tulay.
Haeos ap-at nga aksidente eon sigon ro anang nasaksihan sa lugar.
