Ginklaro it grupong Bagong Alyansang Makabayan ukon Bayan Aklan nga bukon sanda it mga terorista kundi ginapakigsukoe eamang nanda ro kinamatarong it mga kubos nga Pilipino ag proud ro mga raya bilang aktibista.
Raya ro naging sabat ni Mr. Kim Sin Tugna, provincial coordinator it Bayan Aklan kasunod sa akusasyon it Philippine Army nga nagapataeang eamang sanda it mga tawo.
Makahaeadlok suno kay Tugna ro akusasyon kanda it mga katapo it Philippine Army nga kaparte sanda sa mga terorista nga nagakontra sa gobyerno.
Ro series it red tagging sigon hay bukon eon it makatawo bangud nga uwa man sanda nagapanago sa gobyerno kundi nagaguwa pa ro mga raya sa mga nagapangunang karsada ag nagapatigayon it nagkaeain-eain nga rally agud nga ipaintindi sa mga tawo ro presenteng sitwasyon it nasyon.
Ginpahayag dugang ni Tugna nga ro andang kawsa hay maging boses it mga kubos nga Pilipinhon agud nga mataeopangdan it gobyerno.
