KALIBO, Aklan — Sambilog ro Bagong Alyansang Makabayan (BAYAN) sa mga nagapanawagan kay Ako Bicol Partylist Rep. Zaldy Co nga mag-uli eon sa Pilipinas sa tunga it mga isyung may kaangtanan sa makadueudang mga budget insertion ag mga anomalya sa mga proyektong pampubliko nga gina angot kana.
Suno kay Kim Sin Tugna, provincial coordinator it Bayan Aklan nga importanteng mag-uli imaw agud nga atubangon nana kon minatuod ukon bukon ro mga alegasyon.
Ginpahayag dugang nga kon nahimo it gobyerno nga paulion ro pilang lokal nga opisyal nga may ginapangatubang nga kaso, dapat man nga obrahon raya kay Rep. Co, nga ginasugid nga idtu makaron sa Amerika agud nga magpabueong.
Makabig man sigon nga pagpang insulto sa ikasarang it health care system sa nasyon ro anang pahayag nana nga indi masarangan nga boengon sa Pilipinas ro anang sakit.
Nauna man imaw nga nagpaandam nga maga-resign imaw sa pwesto kon imaw hay pagapiliton, apang indi eon imaw mag-uli sa nasyon.
Dugang pa ni Tugna nga kinamatarung it mga nagabayad it buwis nga i-insister nga maagto ro buwis sa tama ag mapuslanon nga mga proyekto ag bukon it sa boesa it mga korap nga opisyal it gobyerno.
