KALIBO, Aklan — Humupa eon ro baha sa haeos 17 nga banwa sa probinsiya it Aklan tuga it mabaskog ag owa it untat nga pag uean daea it bagyong Agaton.
Insigida nga nagpagowa it mga heavy equipment ag mga truck ro provincial government ag Department of Public Works and Highways (DPWH) agud mahakot ro mga stranded nga pumueoyo nga naigpit sa madaeom nga baha.
Sa Barangay Laguinbanua East, Numancia, Aklan, hasta sa hawak ro kadaeom it baha samtang sa banwa it Kalibo, dahan-dahan ro pag agi it mga saeakyan bangud sa gutter-level nga baha.
Sangka tulay sa banwa it Madalag ro indi maagyan bangud sa pag apaw it tubi.
Sa pihak nga parte, 80 nga pamilya nga kaabuan hay naga estar maeapit sa kilid it Aklan River sa banwa it Kalibo ro gin daea sa evacuation center kun siin naga pabilin sanda sa makaron.
Naka eksperyensiya man it power interruption ro pilang banwa nga binaha.
Nagdeklara man it pagsuspinde it klase sa elementarya ro pilang banwa kapareho it Kalibo, Numancia, Malinao ag Madalag.
Samtang, patay ro sangka American national matapos nga inatake sa tagipuso-on sa kasagsagan it pagbaha sa Brgy. Bulwang, Numancia.
Patay eon kat makaabot si James Russel Landstrom, 72 anyos, sa sangka pribadong ospital nga gin padangat it mga tawuhan it Provincial Disaster Risk Reduction and Management Office.
