KALIBO, Aklan—Aminado si P/Major Willian Aguirre, deputy chief of police it Kalibo Municipal Police Station nga nabudlayan eon sanda sa pagpatigayon it imbestigasyon sa nasapwan nga alagang baka nga ginmatansa it owa nakilaea nga mga manakaw sa Barangay Bakhaw Sur, Kalibo, agahon it Miyerkules.
Suno kana nga pag-abot it kapulisan sa lugar hay maabu eon nga mga usyusero rason nga owa eon na-preserve ro crime scene ag na-contaminate ag nasamad ro pilang mga physical evidence nga posibleng makabulig kunta sa pagtumod sa mga suspek.
Ginpahayag dugang nga may kapareho man nga modus ro natabu kara ko nagtaliwan nga mga dinag-on ag nadakpan ro mga suspek.
Bangud kara, ginakabig nga persons of interest it mga intelligence operatives ro mga nadakpan dati nga responsible sa nasambit nga krimen.
Ginpahayag pa ni Major Aguirre nga mabudlayan man ro mga suspek nga mabaligya per kilo ro mga ginmatansa nga tinakawan nga karne it baka bangud nga owa raya it tatak halin sa slaughterhouse.
Mabahoe ro andang pagduda nga pangkonsumo eamang ro tuyo it mga suspek bangud nga ap-at nga paa it baka ag karne sa eawas ro ginpangbo-oe.
Nakipag-angot eon man sigon sanda sa mga banwa nga maeapit sa suba agud nga makabulig sa pagsolbar sa krimen.
Angot kara, nagpanawagan man imaw sa mga nagapanag-iya it kasapatan nga indi pagpabay-an ro andang mga alaga ag gihiton raya maeapit sa andang baeay agud nga indi mataw-an it oportunidad ro mga nakabantay nga manakaw.
