Bakasyunistang nagbulig sa nagakaeonod nga kaparehong-bakasyunista sa Boracay, patay

KALIBO, Aklan — Patay ro sangka 50-anyos nga bakasyunista matapos nga maeomos samtang ginaeowas ro kaparehong bakasyunista nga nagakaeomos matapos nga magpaligos sa baybayong sakop it Barangay Balabag sa isla it Boracay.

Gindaea pa sa Ciriaco Tirol Memorial Hospital it mga rescuer halin sa Stand Paddle Board Association apang gindeklarang patay ro biktimang si Roberto Baisas Jr., residente it Sta. Cruz, Laguna.

Base sa report it Malay Police Station, nataeopangdan it biktima nga ginahunos it mabaskog nga agos it dagat ro sambilog pang bakasyunistang si James Mathew Alpapara, 20-anyos, residente it Cebu City ag nagasinggitan it bulig rason nga nag-eosong raya sa dagat ag gihana raya nga eowason.

Samtang, nagaeangoy hay ginhampak man ro biktima it mabahoe nga humbak ag gulping naeomos.

Insigida imaw nga ginbuligan it mga rescuer ag madasig nga gindaea sa ospital apang uwa eon nakaabot pa it buhi.

Naeowas man ro unang naeomos nga ginbuligan it biktima nga sa makaron hay padayon nga ginaobserbahan sa ospital matapos nga ma-comatose.

Nasayuran nga bukon it magkakilaea ro daywa ag nagkusa eamang ro biktima nga buligan si Alpapara.