KALIBO, Aklan–Nagpasa it sangka resolution si Kalibo Sangguniang Bayan member Augusto Tolentino angot sa pagpaabot it suporta sa tikang it gobyerno nga mabakunahan ro mayorya it mga pumueoyo sa Pilipinas.
Tuyo kara nga makaangkon it dugang nga proteksyon ro mga pumueoyo kontra COVID-19 ag iba pang variants.
Ginpaboran man it haeos bilog nga konseho ro kaundan it resolution ag nagpaathag it pilang ka mga suhestiyon kaeakip ro house-to-house vaccination ag pagpabaskog sa pagpabakuna it booster shot.
Makabig man sigon raya nga kaparte it preparasyon para sa in person classes it mas maabu nga eskwelahan ag maprotektahan ro mga estudyante kontra sa virus.
Nagaeaum si Tolentino nga sa makarondayang pamaagi hay malikawan nga mauyang ro masobra 27 million doses it bakuna nga maga-expire sa buean it Hulyo.
