KALIBO, Aklan—Ginsurender sa Kalibo Municipal Police Station ni Punong Barangay Vic Mandal it Caano, Kalibo ro narekober nga sangka bala it kalibre 45 nga baril it sambilog sa mga residente sa nasambit nga lugar.
Suno kana nga tuyo kara nga makabulig sa imbestigasyon agud nga matumod ro mga suspek engkaso nga raya hay may kahilabtanan sa natabu nga pagbaril patay sa 31-anyos nga kolektor it motorcycle dealer nga si Julius Cuesta sa national highway nga sakop it Barangay Caano, Kalibo, agahon it Martes, Marso 12, 2024.
Ginpahayag ni kapitan Mandal nga ro gin turn over nga bala nga nakita sa kilid it karsada hay bag-o pa.
Nasayuran nga hasta sa makaron hay owa pa it lead ro kapulisan kon ano nga bala ro gingamit bangud nga owa sanda it nakita nga basiwo sa crime scene.
Mag-eowas kara, nag-agi sigon sa lugar ro motorcycle riding suspects sa andang pagpaeagiw.
Kadungan kara, nagpanawagan ro opisyal sa mga residente nga posibleng nakasaksi sa krimen nga magguwa ag magtau it pahayag agud nga mataw-an it hustisya ro pagkamatay ni Cuesta.
Presenteng ginalamayan si Cuesta sa andang residensiya sa Brgy. Tambak, New Washington kon sa siin makita sa ibabaw it anang kabaong ro mga isiw sa pagpati nga makonsensiya ro mga suspek ag magsurender.
