KALIBO, Aklan — Gindeklara eon ro state of calamity sa banwa it Balete sa probinsiya it Aklan tuga it padayun nga pagtaas it kaso it dengue.
Suno sa Provincial Health Office (PHO)-Aklan, umpisa Enero 1 hasta Hulyo 20 it makaron nga dag-on hay nag-abot eon sa 265 ro dengue cases sa nasambit nga banwa .
Samtang, padayun man ro pagtaas it kaso it sakit sa bilog nga Aklan nga nauna eon nga nagdeklara it dengue outbreak.
Base sa datos it PHO-Aklan, nag-abot eon sa 2,999 ro kaso it dengue sa Aklan kun sa siin 16 eon ro namatay.
Sa ginpatigayon nga press conference, uman nga gin-engganyo ni Dr. Cornelio Cuatchon, provincial health officer II ro publiko nga protektahan ro kaugalingon kontra sa sugod it namok ag magbuylog sa maeapnagon nga clean-up operation kada adlaw it Biyernes ag Sabado.
Ginlaygayan man nana ro mga nakakabatyag it mga sintomas it dengue eabi eon ro may eagnat it daywang adlaw nga insigidang magpakonsulta sa doctor.
