KALIBO,Aklan– Nagapadayon sa makaron ro kampanya it Balete Municipal Police Station angot sa Oplan discipline zone and safety operation para sa mga motorista sa banwa it Balete.
Raya hay sa pangpanguna ni PMajor Bryan Alamo, Officer In Charge it Balete PNP.
Suno kay PMaj. Alamo nga owa eamang sanda nakatutok sa pagpatuman it Law enforcement apang ro padayon man nandang pagtao it dugang kasayuran sa mga pumueuyo eabi eon sa mga driver may kaangtan sa road safety
Samtang nagapadayon sigon ro andang adbokasiya hay kasunod man kara ro maabong motorista nga nadakpan nga may pag-eabag sa laye sa trapiko.
Apang masami nga ginataw-an anay nanda raya it warning ag ginapadumdum ro mga nagakaigong penalidad sa tiempo nga madakpan it uman.
Angot kara, magapatigayon man ro Balete PNP kabulig ro lokal nga gobyerno it nasambit nga banwa ag Land Transportation Office ukon LTO-Aklan it free theoritical seminar sa Hunyo 29 it presenteng dag-on.
Tuyo kara nga mataw-an it dugang nga awareness ag kasayuran ro mga pumueuyo angot sa road safety kamana man mataw-an it libreng seminar ro mga pumueuyo nga maga-apply it student license.
Ginklaro dugang kara nga may existing ordinance sandang ginapatuman angot sa “ No helmet zone” partikular sa may bahin eamang it Poblacion area sa banwa it Balete.
Raya hay ginapatuman para malikawan ro mga insidente kapareho it riding in tandem nga masaming indi makilaea bangud sa nakasuksok it full face helmet ro mga suspek.
Sa pihak nga parte, gintan-aw ag naghimu eon sigon ro andang taeatapan it nagakaigong aksyon angot sa mga daeanon nga under construction nga may kakueangan sa signages nga nagatuga it pilang ka mga serye it aksidente.
