KALIBO, Aklan—Nagapatigayon eon it case build-up ro Balete Municipal Police Station angot sa sunud-sunod nga insidente it panakawan sa banwa it Balete.
Suno kay P/Major Bryan Alamo, hepe it Balete PNP Station nga pinaagi sa impormasyon it mga tagreklamo ag mga testigo hay may natumod eon sanda nga mga persons of interests.
Posible suno kana nga sa masunod nga mga inadlaw hay may una eon nga resulta ro andang imbestigasyon.
Madumduman nga kan-o eamang hay may natabu nga insidente it panakawan sa Brgy. Poblacion ag Brgy. Fulgencio sa nasambit nga banwa kun sa siin kaeabanan sa baeay hay nahamtang sa kilid it national highway.
Sa pihak nga may nadakpan nga daywang menor de edad nga gina-alegar nga eakot sa theft incident ko nagtaliwan nga mga inadlaw, apang owa sanda nagapakampante ag padayun ro pagtumod sa iba pang posibleng mga suspek.
Ginpahayag dugang nga mag-eowas sa banwa it Balete hay may nagakatabu man nga kaparehong insidente sa iba pang banwa.
Padumdum man it opisyal nga mag-doble dahan ro mga residente agud nga indi maging potensyal nga biktima eabi pa ag malisod sigon ro pagpangabuhi makaron kun sa siin maabu ro natentar nga magpanakaw agud nga may makaon.
