KALIBO, Aklan—Balik eon man sa mainit nga tiempo ro temperatura sa Texas, USA.
Raya ro ginpahayag ni Bombo International Correspondent Pinoy Gonzales it Houston, Texas.
Suno kana nga matapos ro pilang adlaw nga below zero ro temperatura hay nakaexperiensiya eon makaron it mataas nga temperatura nga ro init hay kapareho sa Pilipinas.
Natapos eon man sigon ro andang kalbaryo sa kawad-an it supply it kuryente ag tubi, apang nagpaguwa it advisory ro andang gobyerno nga pabukaean anay ro tubi antes nga gamiton matapos nga nagapadayun ro repair sa andang sumabog nga mga tubo.
Bangud sa kahadlok nga uman nga magpanaeasa ro snow storm, kada adlaw suno hay nagaka-ubusan it baligya nga pagkaon sa andang mga supermarkets.
Pagsueod suno kana it init ko Biyernes nga adlaw hay madasig man nga natunaw ro mga snow sa daeanon.
Apang grabeng kasamaran ro gintuga kara sa mga pananum ag mga kasapatan it mga residente ag mangunguma sa Texas.
