KALIBO, Aklan—Balik eon sa normal ro pagpangabuhi sa Estados Unidos kasunod it madasig nga vaccination program kontra sa coronavirus disease 2019 ukon covid-19.
Raya ro ginpahayag ni Bombo International Correspondent Pinoy Gonzales it Houston, Texas.
Syento porsiyento eon sigon nga bukas ro ekonomiya sa nasambit nga nasyon.
Mag-eowas kara, ginbuksan eon man ro pilang mga eskwelahan eabi eon ro mga ginapadaeagan it mga republicans.
Sa pihak kara, padayun gihapon ro andang pagsuksok it face mask ag instriktong ginapatuman ro physical distancing.
Tatlong bakuna suno kana ro ginagamit makaron sa US nga ginaeakipan it Pfizer ag moderna nga may daywang shots ag ro Johnson and Johnson nga sangka shot eamang.
Sa kamatuoran suno kana nga imaw hay naturukan eon it bakuna nga himo it Johnson and Johnson ag owa imaw it anuman nga nabatyagan nga side effect.
Angot kara, gin engganyo ni Pinoy ro mga Filipino nga magpabakuna ag indi eon magduha-duha bangud nga mabahoe raya nga proteksyon kontra sa deadly virus.
Nauna eon man sigon nga nagpaabot it panibag-ong pag-eaum ag nag apela it bulig si US President Joe Biden sa anang mga pumueuyu.
Gin-anunsyo kara ro anang plano nga pag-abot it mayo 1 hay eubusan eon nga mabakunahan ro tanan nga mga adults nga kwalipikadong magbaton it bakuna agud nga madeklara eon nanda ro kahilwayan halin sa virus kadungan it selebrasyon it andang independence day sa July 4.//
