KALIBO, Aklan — Paga umpisahan eon it Presidential Electoral Tribunal (PET) sa Pebrero sa madason nga dag-un ro recount it mga boto may kaangtanan sa election protest nga ginpasaka ni dating Senador Ferndinand “Bongbong” Marcos, Jr., kontra kay Vice President Leni Robredo.
Sa interview it Bombo Radyo Kalibo, gin pahayag ni Georgina Hernandez, tagapaghambae ni VP Leni nga sa Enero 22, 2018 hay paga umpisahan ro pag-retrieve sa mga balota maghalin sa gina kwestiyung clustered precincts sa Camarines Sur, ro balwarte it bise presidente.
Sakop sa gihapon it ballot recount ro Iloilo ag Negros Occidental nga suno kay Marcos hay may natabong maeapnagon nga dayaan.
Gin pahayag dugang pa ni Hernandez nga engkasong napamatud-an nga owa it iregularidad sa tatlong pilot provinces,eubusan eon nga iga basura ro protesta ni Marcos bangud sa kakueangan it merito agmadeklara si Robredo nga nailihir nga bise presidente it nasyun sa gin patigayung eleksyon ku Mayo 2016.
Sa pihak nga parte, gin basura man sigon ro pangatlong kaso nga gin pasaka ni Marcos angot sa pagkakas it mga boto nga naghalin sa Lanao del Sur, Maguindanao ag Basilan.
