KALIBO, Aklan—Umpisa sa Pebrero 3 hay makaangkon eon it kaugalingon nga fire stations ag fire trucks ro mga banwa it Banga ag Batan.
Suno kay Fire Chief Inspector Patricio Collado, provincial fire marshall it Bureau of Fire Protection ukon BFP-Aklan nga ko nagtaliwan nga adlaw it Huwebes, Enero 28 hay nauna eon nga gin-activate ro fire station it Nabas nga eubus nga ginkalipay it mga opisyal ag mga pumueuyu para sa madasig nga pag-responde sa mga insidente it sunog.
Sa diskurso ni BFP regional director Senior Superintendent Jerry Candido sa ginpatigayon nga activation ceremony ag pagdeploy it firetruck engine 61, ginpromisa nana nga pagapadayunon ro construction it building it fire station sa banwa it madalag nga gin-umpisahan nga gintukod kato pang 2015.
Kaibahan man sa anang plano nga igasaylo ro opisina it Provincial Fire Marshall sa banwa it Banga sa oras nga matapos eon ro andang fire station building.
Temporaryong naga-operate ro fire station it Banga sa likod it andang Municipal Police Station.
Samtang, ro LGU lezo suno kana hay may gintaeana eon man nga lote nga kapin sa 400 square meters nga pagapondohan it ahensiya it kapin sa 7-milyon pesos.
Sa makaron hay may una eon nga 16 nga fire stations sa aklan ag sub-fire station sa Boracay, mag-eowas sa banwa it Lezo.
Gindugang pa ni Chief Inspector Collado nga ro trabaho it BFP hay owa eamang nakatutuk sa firefighting kundi sa rescue operations ag emergency medical services man.
Mas pa suno kana nga pagapabaskugon it BFP ro andang special rescue unit sa Aklan.
