KALIBO, Aklan—Aminado ro Rural Health Unit (RHU)-Banga nga nakaangkon it pagtaas sa mga nailistang kaso it Coronavirus Disease 2019 ukon COVID-19 sa andang banwa.
Suno kay Ms. Donnalyn Siyambio, tagapaghambae it Banga Municipal Inter-Agency Task Force nga nakalista eon sanda it kabilugan nga 596 nga mga kumpirmadong kaso it sakit.
Sa nasambit nga numero, 89 pa ro nabilin nga aktibong kaso kun siin 11 ro namatay ag 496 ro mga nagmayad matapos ro pagbueong ag quarantine procedure.
Dugang pa ni Siyambio nga ginahueat pa nanda ro resulta it RT-PCR test it 41 nga mga swab sample nga ginpatigayun ko adlaw it Miyerkules ag dugang nga 43 kahapon, adlaw it Biyernes. Nag-apela man raya sa publiko nga likawan anay ro pagpilinanaw eabi eon kun owa man it importanteng transaksyon agud mapunggan ko pagkalhit it COVID-19 infection.
