Kalibo Aklan ——–Kasunod it pilang adlaw nga pagpaidaeum sa lockdown it Banga Public Market hay temporaryo man nga igasarado umpisa makarun nga adlaw it lunes hasta hin-aga nga adlaw it martes ro Banga Municipal Hall it nasambitan nga banwa.
Raya hay matapos nga magpositibo sa makamaeatay nga virus nga COVID-19 ro sangka empleyado it taeatapan kamana man nga mataw-an it daean ro igapatigayon nga disinfection.
Suno kay Ms. Donnalyn Siyambio, Public Information Officer it Lokal Inter-Agency Task Force it LGU-Banga nga kanselado anay ro tanan nga transaksyon sa munisipyo apang nagapabilin man nga bukas ro taeatapan it Municipal Health Office (MHO).
Nasayuran nga ro nasambitan nga tikang hay nagpagdesisyunan it Local IATF matapos nga makalista it 14 ka mga panibag-ong kaso it COVID-19 ro banwa base sa ginpaguwa nga datos it Provicial Health Office (PHO) ko adlaw it Sabado kung siin nakalista man it sambilog pang namatay.
Samtang pihak nga parte, ginpaidaeom man sa granular lockdown ro Brgy. Palale sa nasambit nga banwa matapos nga nakalista it mga indibidwal nga nagpositibo sa nasambit nga masakit.
Sa makaron hay nagapadayon ro monitoring ag contact tracing it Banga MHO agud nga inde eon mag-eapta ro deadly virus.
Samtang, nag-apela man ro Local Government Unit (LGU) sa banwa it banga sa publiko kasunod it nagatinaas nga kaso it coronavirus disease 2019 (COVID-19).
Suno kay Ms. Siyambio nga indi eun masarangan it MHO ag LGU ro andang sitwasyon kung indi magpartisipar ro mga pomoeuyo.
Gineaygayan man kara ro mga Banganhon nga padayun nga magsunod sa ginapatuman nga health protocol kamana man nga likawan anay ro pagpatigayon it mass gathering ukon limitahan eamang sa mga pamilya ro mga bisita kung may ginapatigayon nga party.
