KALIBO, Aklan—May tatlong bag-ong kaso it Coronavirus Disease 2019 ukon covid 19 nga nailista sa banwa it Banga ko Disyembre 31, 2020.
Suno kay Donnalyn Siyambio it Banga Municipal Health Office nga ro andang ika-19 nga kaso hay sangka 59 anyos nga beautician nga tumandok it Mambog, Banga.
Ginpaidaeum sigon raya sa swab test matapos nga maduea-an it panlasa ag panghugum ko Disyembre 25 ag nakumpirma nga imaw hay positibo sa sakit sa pagguwa it anang swab test result ko Disyembre 29.
Nagapabilin ro pasyente sa andang barangay isolation unit nga owa eon it nabatyagan nga sintomas.
Presenteng naka-home quarantine ro 11 nga mga high risk contacts kara , kun sa siin sa ginpatigayon nga RT-PCR tests, 10 ro negatibo ag sambilog ro nag-positive nga gintumod nga ika-21 nanda nga kaso.
Raya hay sangka sang dag-on nga ungang eaeaki nga taga-Tabayon Banga.
May sangkiri sigon nga ubo ro pasyente ag presenteng gina-alagaan it anang ina sa andang ligtas covid facility.
Ro anang limang close contacts hay naka-home quarantine ag nakataeanang pagaboe-an it swab specimen samples.
Sa pihak nga parte, ro ika-20 nga kaso hay residente it Polo, Banga.
Imaw hay 56 anyos nga babaye nga nagatrabaho bilang hospital health care worker sa banwa it Kalibo.
Ginasugid nga natapnan raya sa sangka local case sa Kalibo.
Asymptomatic ro pasyente ag naka-facility quarantine sa Kalibo.
Owa raya it natumod nga close contacts sa banwa it banga bangud nga umpisa ko Disyembre 22 hay idtu raya naga-uli sa baeay it anang igmanghud sa Kalibo.
Samtang, gindugang pa ni Siyambio nga temporaryong ginpasaraduhan ro livelihood center sa sueod it Banga Public Market ag gin-disinfect partikular ro parlor nga gina-obrahan it beautician nga si case no. 19.
Angot kara, padayun nga ginapadumdum it MHO-Banga ro publiko nga padayun ro pagsunod sa ginapatuman nga health and safety standards agud nga makalikaw sa makamaeatay nga sakit.
