KALIBO, Aklan—Nakalista it tatlong dugang nga bag-ong kaso it Coronavirus Disease 2019 (COVID-19) sa banwa it Banga.
Suno kay Donnalyn Siyambio, tagapaghambae it Local Inter-Agency Task Force it LGU-Banga, nga ro tatlo nga nagpositibo sa RT-PCR test hay ginaeakipan it case no. 43 nga sangka 75 anyos nga babaye halin sa Barangay Linabuan Sur, Banga.
Natapnan kara si Case No. 44 ag Case No. 45 nga puro mga residente man it nasambit nga lugar.
Gin-admit sa Aklan Provincial Hospital ro 75 anyos nga magueang ko pebrero 3 matapos nga makaangkon it hapo.
Ginasugid nga owa raya it history of travel sa guwa it Aklan ukon nakaangkon it exposure sa COVID-19 nga pasyente.
Samtang, ro 44 anyos nga eaeaki hay asymptomatic ukon owa it ginabatyag nga sintomas samtang ro 39 anyos nga babaye hay may mild symptoms , apang parehong gin daea sa local covid center it banga.
Ro pitong iba pa nanda nga miyembro it pamilya nga ginakabig nga high risk contacts hay ginmanduan nga magpaidaeum sa quarantine ag ginboe-an it swab specimen samples makaron nga adlaw it lunes.
Ro iba pa nanda nga contacts sa guwa it banwa it banga hay gin-refer sa andang natungdan nga RHU.
Bilang kaparte it safety protocol, ro andang daywang baeay hay ginpaidaeum sa surgical lockdown ag ro swimming pool resort sa nasambit nga lugar nga ginapanag-iyahan it nasambit nga pamilya hay temporaryong ginpasarado.
Samtang gintugyan eon sa RHU-Kalibo ro dapat nga obrahon sa cosmetic store it pasyente sa banwa it kalibo kun sa siin idtu man nagatrabaho si case No. 45 bilang kahera.
