KALIBO, Aklan–Nagapadayon ro imbestigasyon it kapulisan sa natabu nga panakawan sa sangka grocery store sa Barangay Poblacion, Banga kun sa siin naging biktima ro sambilog sa andang customer.
Suno kay P/SSgt. Elmar Relente it Banga Municipal Police Station nga naga-abot sa masobra sa P11,500 nga cash, daywang ATM cards nga may sueod nga ginatantiya nga P80,000, drivers license ag iba pang importanteng dokumento ro natigayon nga matakaw sa sangka ginang matapos nga mabiktima it salisi gang samtang nga naga-grocery sa nasambit nga establisimento, bandang alas-10:00 Huwebes it agahon.
Dismayado ro biktimang si Alma Gumban nga nag-agto sa estasyon it pulisya agud nga i-report ro insidente.
Suno kana nga magabayad eon kunta imaw sa cashier it anang mga ginpamakae kat mataeupangdan nga owa eon ro anang pouch.
Sa pag-review sa CCTV footage, nakita nga samtang masako ro biktima sa anang pagpili it mga baeak-eon, ginpalibutan raya ag gin-gitgit it mga suspek nga ginaeakipan it tatlong eaeaki ag sangka babaye.
Matapos nga mabo-oe ro pouch hay tig-sambilog nga nagguwa ro mga suspek halin sa nasambit nga grocery store.
Naging mabudlay man sa mga otoridad ro pagtumod sa identity it mga suspek bangud sa suksok nga face mask.
Nasayuran nga raya eon ro ikaywang insidente it pag-atake it salisi gang sa nasambit nga banwa.
