Banga PNP, ginpasiguro nga paga-imbestigahan ro nag-viral nga post sa social media it 2 miyembro it Banga Auxiliary Police
KALIBO, Aklan–Ginpasiguro it Banga Police Station nga paga-imbestigahan ro nag-viral nga post sa social media it daywang miyembro it Banga Auxiliary Police ukon BAP nga magka-angkas sa motorsiklo.
Ro nasambit nga post hay umani it nagkaeain-eain nga negatibong reaksyon halin sa mga netizen bangud nga makabig raya nga pag-eabag sa ginapatuman nga sueundanan it national inter-agency task force on covid-19 .
Kaeabanan sa komento it mga netizen hay ro pagbatikos kanda bangud nga masyado sigon sanda nga instrikto sa ginapatuman nga laye it trapiko, mag-eowas pa nga arogante ag sobra kataas magpapanaog it multa maskin nga nagapangatubang ro tanan sa kalisod tuga it covid-19 pandemic.
Apang numero uno man sanda nga violator.
Nasayuran nga mag-eowas sa nag-viral nga post it daywang magka-angkas nga BAP member hay sambilog pang litrato ro nagakalhit makaron nga ginpost it sangka netizen nga makita ro sangka BAP member nga owa it helmet nga nakasakay sa motorsiklo nga owa man it plate number.
Suno kay P/Capt. Benny Jones Mendoza, bag-ong hepe it banga PNP nga iga-verify nanda ro nasambit nga mga litrato ag igapatawag ro mga eakot nga BAP member para sa andang explinasyon agud nga pinaagi kara hay makahimo man sanda it nagakaigo nga rekomendasyon kay mayor erlinda maming para sa nagakaigo nga aksyon.
Sa pihak nga parte, gindayaw ni Capt. Mendoza ro mga BAP members bangud nga sa pihak it waea-tuo nga reklamo, raya hay nagapakita eamang suno kana nga ginatuman nanda it mayad ro andang trabaho bilang pagsunod sa naga eksister nga polisiya.
Ginklaru man nana nga ro pinaka mataas nga multa sa pag-eabag sa laye it trapiko sa idaeum it sangka ordinansa hay 2,500 pesos eamang.
Angot kara, nag apela man imaw sa mga motorista nga magkooperar bangud nga ro ginapatuman nga traffic rules and regulations hay sandig sa municipal ordinance it Banga.
